الفرق بين محطات التوليد التقليدية، والمحطات النووية

أول سؤال ممكن نسأله، ايه هو الفرق بين المحطات التقليدية و المحطات النووية؟؟؟
الحقيقة ان توليد الكهرباء يعتمد هنا اساسا على الطاقة البخارية اللي بدورها بتحرك تربينة بخارية متوصل معاها مولد كهربي.
دول صورتين توضيحيتين، الاولي لمحطة توليد تقليدية شغالة بالوقود الحجري اللي هو الفحم، والتانية لمحطة نووية شغالة طبعا بالوقود النووي اللي هو اليورانيوم....

لو دققتوا النظر في الصورتين هتلاحظوا حاجتين مهمتين جدا جدا، اولا: تقريبا النوعين بيشتغلوا بنفس المبادئ والخطوات، وهي ان الوقود بيسخن الماء علشان يولد بخار، البخار ده بيحرك تربينة، التربينة دي مربوط عليها مولد هيدور طبعا بنفس سرعة التربينة، و بكدة نبقى ولدنا كهربا، طبعا فيه دايرة تبريد زي مانتوا شايفين علشان مولد البخار مش ينفجر.
ثانيا وده الاهم: في المحطات التقليدية بستخدم غلاية ماء علشان نولد البخار، لكن في المحطة النووية بنستخدم مفاعل نووي علشان نحصل منه على الحرارة اللازمة لتسخين الماء وتحويله لبخار، وهو ده الفرق الاساسي بين المحطة التقليدية والمحطة النووية.

فيه فرق تاني بين النوعين، وهو التأثير على البيئة، أنا مش هتكلم، بس هسيب الصورتين الجايين هما اللي يتكلموا وانتم ابقوا علقوا، الصورة الاولى لمحطة تقليدية و التانية لمحطة نووية:

المرة الجاية بإذن الله هنتكلم عن نظرية عمل المفاعل النووي، يا رب اكون قدرت افيدكم بحاجة عن الموضوع ده، لو فيه اي سؤال او تعليق أرجوكم تراسلوني في المنتدى هنا او على بريدي الالكتروني thebigboy_eng@yahoo.com
ارجو منكم الاطلاع و الرد عشان اشوف مدى تقبلكم للموضوع، أسألكم صالح الدعاء، سلااااااااااااااااااام.